كان نفسي اتجوزها ( 6 )

السبت أبريل 28, 2012 10:59 pm

]b]عمر ساب ياسر وراح يدور علي (ام ياسر) .. وياسر راح عند الاستيدج اللي عليه العريس والعروسة

عارفين لقي ايه اللي بيحصل ؟؟

لقي حسام ونهال بيرقصوا سلو .. قدام كل الناس .. وفاكرينها رومانسية !!

ياسر ( لنفسه ) : ياااااه .. بجد يا خسارة يا نهال .. يا خسارة .. عمري ما توقعت انك ترخصي نفسك كدة

مش معني انك مراته ان يكون ده ليكي عذر

ازاي حسام ده .. يتصنف راجل تأتمني علي نفسك معاه .. وهو مش محافظ عليكي من عين كل واحد مريض شايف نفسه مكانه في خياله !!

وانتي ازاي يعجبك راجل مفيهوش ريحة النخوة !!

فاق ياسر علي صوت اتنين ستات من اهل حسام (العريس) قاعدين قدامه بيكلموا بعض

- بقي بنتي انا .. الجميلة الحلوة .. المتعلمة اللي معاها ليسانس .. تتساب علشان واحدة معصعصة زي دي!!

- عندك حق يا ام شادي .. البت مش حلوة خالص .. مش عارفة عجبه فيها ايه ؟ ده حتي مناخيرها بطاطساية .. ده شكوكو احلي منها

- ايوة حتي بصي علي امها تخينة ازااااي .. شكلهم عالم بيئة

- والله يا ام شادي بنتك ضفرها برقبتها .. واحنا مالنا ياختي .. احنا منحبش نجيب سيرة حد

اااه ياني من عواجيز الفرح .. وكلامهم اللي يحرق الدم

ياسر كان في حيرة من امره .. مش عارف هي نهال تستاهل يتقال عليها كدة علشان فرطت في نفسها اوي كدة؟؟

ولا هي متستاهلش .. لأنها لسة صغيرة وطايشة !!

قال في عقل باله .. كدة كدة دي غيبة .. وزي ما قالوا علي نهال .. بكرة يتقال علي اولادهم

طالما حاطين المقياس الحلاوة والوحاشة .. يبقي ربنا نجي حسام من نسب اهله

اللي هو اكيد طالعلهم .. يا ستير يارب !!

-----------

علي الجانب الاخر ..

عمر ماشي يدور علي ام ياسر .. بيبص حواليه في كل ناحية

خبط في بنت ماشية ومعاها كوباية شربات ورد

الشربات اتدلق علي القميص الابيض .. وبرضو بهدل فستانها وحجابها الكبير الاحمر البطيخي الفاتح

البنت (في منتهي الخجل والاحراج) : اسفة والله يا فندم جدا جدا .. والله ما كانش قصدي

عمر ( خايف لتكون دي كمان هتعاكس ) : يا دي اليوم اللي مش فايت

البنت ( عنيها بدات تدمع من الخضة ) : بجد انا في غاية الاسف والله

صوووت بينادي علي البنت من بعيد .. ابتهاااااال .. بتعملي ايه عندك ؟

تلفتت ابتهال لتجد والدتها تنادي عليها .. وعينها يملؤها الغضب لأنها تقف مع شاب غريب!!

ابتهال : والله يا ماما مكانش قصدي !!

والده ابتهال : خدي رحمة اختك معاكي .. متمشيش لوحدك

ابتهال : تعالي يا رحمة .. معايا

عمر مشاففش صوت والدتها ده جي منين ؟ وبيبص لأبتهال .. لقي انها مكانتش شيفاه اصلا .. ومش بتبص غير في الارض او اي حتة تانية

قال في سره : سبحان الله !! البنات فعلا مش زي بعض .. ايه يجيب دي .. للي خبطتني من يجي ساعة !!

كانت رحمة بنت تبدو في الثالثة عشرة عاما .. وصغيرة الحجم .. وابتهال تبدو في العشرين

-------------

عمر وجد والدة ياسر ..

عمر : طنط ام ياسر .. اخيرا !! عمال ادور علي حضرتك

ام ياسر : ازيك يا عمر يابني عامل ايه؟؟

عمر : الحمد لله يا طنط .. ياسر كان قايلي ادور عليكي .. ومسيبكيش .. لحد ما هو يسلم علي نهال ويجي

ام ياسر : طيب يا عمر تعالي اقعد معانا .. انا قاعدة مع ناس قرايبنا

عمر : طنط صفية ولا ايه؟؟

ام ياسر : هو ياسر حكالك ولا ايه؟

عمر : ايوة حكالي يا طنط .. همتك معانا بقي علشان نخلص من الواد ده بقي بسرعة ونفرحك بيه يا ام ياسر .. وتفرحوا بية وراه

ام ياسر : ده انا البنات عندي بالهبل .. بس انت قول بس وانا اجيبلك احسن عروسة .. اقولك خد اخت العروسة اللي جيباها لياسر

عمر : لااااااااااااا انا مش عايز حد يجيبلي عرايس .. سيبوني براحتي .. انا مبدأي في الحياة .. الجواز يأتي فجأة

ام ياسر : طب تعالي شوف البنات بس .. والله بنات مؤدبين جدا .. هم لسة مجوش سلموا علية .. بس هم موجودين هنا .. مفيش غير مريم بس

عمر ( في سره ) : مريم تبقي اخت اعتدال !! اقطع دراعي ان مكانش ودان خالتي ام ياسر فيها انّ

----------------

ام ياسر : معلش اتأخرت عليكي يا ام مريم

ام مريم : ولا يهمك يا حبيبتي .. بس متتأخريش عليه تاني .. انتي كنتي فين

ام ياسر : كنت رايحة ادور علي ياسر .. لقيت صاحبه .. اعرفكم ببشمهندس عمر صاحب ياسر .. هو اصغر منه بسنتين .. بس اصحاب الروح بالروح من وهم لسة صغيرين .. وزمايل في الشغل

عمر : السلام عليكم

ام مريم : وعليكم السلام يابني .. اهلا بيك

بينما مريم كانت تنظر الي الارض وردت السلام بتمتمة غير مسموعة نهااائي

مريم بنت تبدو في الخامسة والعشرين من العمر .. هادئة جدا .. ترتدي فستان ابيض وطرحة روز

عمر قاعد ساكت خالص .. اصله ملهووش في كلام الحريم ^_^

-----------------

ونرررررجع تاني لياسر

ياسر كان بيقرب بخطوات بطيئة ناحية نهال .. مش عارف يروح يقولها مبروك ويقول لعريسها؟ ولا يقف مكانه؟

وقف علي جنب لقي ست قاعدة علي جمب ولابسة اسود .. وشكلها حزين جدا

وواحدة قاعدة جمبها بتقولها ربنا يصبرك .. احتسبيه عند ربنا .. ده عدي علي موته يجي 10 شهور

الحي ابقي من الميت ياختي !!

وهي بترد عليها تقولها .. انا مكنش لازم اجي هنا .. كل حاجة هنا بتفكرني بالمرحوم الله يرحمه

يمكن لو كان كل واحد بيراعي ربنا في الافراح وفي المناسبات .. مكنش جرح مشاعر الناس بمنتهي البرود

انا كنت جاية لأني فكرت ان واحدة زي والدة نهال لايمكن تفكر تعمل فرح بنتها الا اسلامي .. او علي الاقل منفصل ومحترم شوية

ياسر ( لنفسه) : كل مدي ما بحتقر الحاجة اللي انتي شوفتيها بسيطة اوي كدة يا نهال .. فعلا لو كان كل واحد بيراعي ربنا في الافراح وفي المناسبات .. مكنش جرح مشاعر الناس بمنتهي البرود

----------------

وجت التورتة اللي ب 5 ادوار

والشوكة اياها اللي بياكل منها الاتنين في وقت واحد قدام الناس

ام ياسر : لالا دي قلة ادب .. ازاي ام نهال توافق علي كدة

ام مريم : ربنا يهديهم يا نوال ياختي .. الشباب اليومين دول بجد عقلهم في التراوة .. مبقوش يخافوا من ربنا

ام ياسر : لا مش كلهم والله يا ام مريم .. انا عندي ياسر .. وعمر كمان ماهو ابني برضو .. عمرهم حتي ما يبصوا علي حاجة زي كدة

ام مريم : مانا واخدة بالي من عمر ماشاء الله عليه .. مبصلناش حتي من ساعة ما قعد في مكانه .. حتي لما خبط في بنتي من شوية محاولش يعاكسها ولا حاجة .. وياعيني قاعد قميصه مبهدل من ساعتها مخدش باله

مريم سمعت الكلمتين دوول .. كتمت الضحك بالعافية .. هي مكانتش واخدة بالها من قميص عمر اللي مليان شربات اتدلق عليه .. بس كلامهم نبهها

عمر بقي اللي كان في نص هدوومه .. وقالهم بأرتباك : طب استأذنكم هروح انضف القميص في التواليت ..دقايق وراجع

عمر في نص السكة قال .. ابتهال !! بنت عمة ياسر واختها رحمة ومريم !!

اومال مين اعتدال دي ؟؟ وبعدين انا ملمحتش اي حد عينه ملونة خالص .. انا مالي !! اكيد هتبان
[/b]

السبت أبريل 28, 2012 10:59 pm

انتظروا الحلقة السابعة قريبا

كان نفسي اتجوزها ( 6 )

كان نفسي اتجوزها ( 6 )

رد: كان نفسي اتجوزها ( 6 )