كان نفسي اتجوزها (7 )

[باربيمراقب عام]

كان نفسي اتجوزها (7 ) ,
حلقة 7

عمر خد بعضه وراح علي التواليت علشان ينضف القميص الابيض اللي اتبهدل بشربات الورد

لقي ياسر واقف .. باصص علي نهال من بعييد وشكله سرحان خالص .. وزعلان

عمر : انت فين يابني.. كل ده بتسلم علي نهال ؟؟

ياسر : والله لسة ما سلمت عليها .. انت ايه مبهدلك كدة؟؟

عمر : بنت عمتك يا سيدي خبطت فيها .. دلقت الشربات اللي في ايدها علي القميص .. بس مكنش قصدها

ياسر : هههههههههههه طيب خد الجاكيت بتاعي البسه مؤقتا .. علشان يداري القميص

عمر : لا يابني تاخد برد كدة

ياسر : اخد برد ايه بس .. خد الجاكيت .. اسمع الكلام وانا هسلم علي نهال واجي

عمر خد الجاكيت وطيران علي التواليت ينضف القميص

ياسر فضل واقف باصص للكوشة .. لقي المطرب الرائع (احم احم ) اللي صوته ملائكي ( استغفر الله العظيم يارب) ماسك المايك .. ورايح علي العرسان الحلوين

وغني يا عريس .. غني يا عرووسة !!

ياسر (لنفسه) : هي باينها ليلة ذنوب في ذنوب من اولها ... يارب يا نهال تبقي عند حسن ظني ومتغنيش بصوتك قدام الناس

-----------

المطرب : يلا يا عريس هتقول لعروستنا الحلوة ايه؟

العريس (بيضحك) : صوتي وحش مش هينفع .. هي صوتها احلي !!

المطرب : لا مينفعش .. يلا غنيلها حاجة علي ذوقك .. دي حتي العروسة زي القمر .. مينفعش متغنيش !!

نهال بتبص لحسام وتضحك ومستنياه يغني .. فأضطر ياخد المايك

حسام (بصوت اجش) : اهواااااك .. واتمني لو انسااااك ..

نهال : تنساني ليه بس كدة انا عملتلك حاجة !!

ضحك الجميع لأن الاغنية حزينه .. وده فرح .. والجميع بين همز ولمز

المطرب : يلا غني يا عروسة .. والله عرفت تنقي يا عريس

نهال خدت المايك منه في ساعتها .. وقعدت تضحك .. وبعدها

حبيبي علي نياته .. كل البنات اخواته ..

والكل بيصقف .. بغض النظر عن صوتها .. بس لأن صوت المرأة عورة .. فلازم تحلي في عين كل اللي واقفين وسامعين وبيصقفوا

-------------

وبين ذلك وتلك .. ياسر مصدووم

ياسر (لنفسه ) : ايه الدم ده!! المطرب الغريب ده قاعد بيعاكس في مراتك كدة وانت بتضحك !!

مراتك قاعدة تغني قدام الناس كدة وتتدلع وانت عادي .. معندكش اي دم !!

وانتي .. بجد انا ندمان اني حبيتك في يوم من الايام .. يا خسارة كل لحظة اتمنيت فيها اكون مكان حسام !!

----------------

ياسر خلاص بقي عنده قناعة ان نهال كانت لا تصلح .. وان اي بنت بتحافظ علي نفسها مهما كانت صفاتها فهي افضل من نهال وهتسعده اكتر من نهال

ادرك ان الرؤية اللي شافها لما نهال قالتله مش بحب حد يصحيني علشان اصلي .. كانت فعلا تحذير من ربنا

قد ايه حضرتك حنين يارب علينا .. وعالم بحالنا .. ومدبر لأمورنا .. وخبير .. سبحانك يارب

ياسر خطي بخطوات ثابته ناحية الكوشة بعد ما العرسان قعدوا

عمر كان طلع من التواليت ولابس الجاكيت الاسود

عمر (بينادي ) : يا ياسر .. استناني .. انا هاجي معاك

ياسر سمعه واستناه وراحوا سوا علي الكوشة

ياسر : مبروك يا عرسان

نهال مدت ايدها لياسر وبتقوله الله يبارك فيك

ياسر : انتي نسيتي اني مش بسلم ولا ايه ؟

نهال : اه صحيح .. نسيت انك منهم .. ايه رأيك في عريسي

حسام بيبص ويضحك .. وياسر بيبصله .. وحاسس ان علي الكوشة فيه عروستين .. مش عريس وعروسة !!

ياسر : لا الله ينور .. ربنا يباركلكم

حسام : طيب وايه رايك في عروستي

ياسر زاد الاحتقار اوي جواه من السؤال ده .. ومعرفش يرد

عمر حس بصاحبه .. وحب يقوم بالمهمة بداله

عمر : متسألش ياسر .. مين يشهد للعروسة يعني .. خد رأيي انا .. الصراحة ما جمع الا لما وفق !!

نظر عمر لياسر .. وفهم ياسر قصده .. وكانوا هيضحكوا من قلبهم علي رد عمر .. بس قدر ولطف .. والعرسان محسوش بالمغزي من كلامهم

----------------

وسابوا العرسان ..

عمر : هم بنات عمتك يا ياسر 3 ولا اربعة ؟

ياسر : 3 .. بتسأل ليه ؟

عمر : بس اساميهم ابتهال ومريم ورحمة .. فين اعتدال دي ؟؟

ياسر ( في ذهول ) : مريم !!

عمر : اه .. مفيش اعتدال

ياسر : انتوا قاعدين فييين .. وفين ماما

عمر : اهم .. تعالي سلم بقي

-------------

ام ياسر : اهو ياسر اهو يا صفية

صفية : يا حبيبي يا ياسر .. ماشاء الله كبرت .. وبقيت نسخة من ابوك الله يرحمه

صفية عنيها دمعت لما افتكرت اخوها وشافت ابنه بيشبهه كتير .. وياسر كان عايز يطبطب عليها بما انها عمته ويهديها بس كان مكسوف

مش حرام ولا حاجة .. بس عادي مش واخد عليها [^_^]

ام ياسر : اهدي بقي يا صفية حرام عليكي متخلنيش اعيط معاكي في الفرح والناس تتفرج علينا !!

صفية : حاضر ياختي ... اهو سكت .. اقعد يا ياسر جمبي

ياسر : حاضر يا عمتي .. ربنا يخليكي لينا

صفية : اعرفك بقي ببنت عمتك .. دكتورة مريم

ياسر شاف مريم بلبسها الابيض في روز افتكر البنت اللي حلم بيها وكانت لابسة ابيض في روز وبتقوله الحمد لله ان ربنا نجاك من الناس اللي متعرفش الحلال من الحرام

فقال لنفسه زي ما قال في الحلم .. سبحان الله

مريم قالت بخجل : لأ انا مش دكتورة بالظبط .. انا معيدة في كلية الزراعة وبحضر ماجيستير

ياسر : ماشاء الله

ياسر لوالدته بصوت واطي : اومال فين اعتدال (الملونة دي ) وبعدين اشمعني الوسطانية .. ما الكبيرة حلوة اهي

ام ياسر : اسكت يا ياسر .. مش طلعت اسمها ابتهال مش اعتدال

ياسر : وروحية طلعت رحمة .. مش كدة .. مش بقولك طيبة وبتشوفي كل حاجة علي ذوقك

ابتهال جت وقتها هي ورحمة .. شافت عمر قاعد علي الترابيذة

قالت : هو حضرتك جيت تقول لماما .. والله فعلا مكانش قصدي يا فندم .. وعلي فكرة انا ممكن ادفعلك تمن القميص .. بس انا مش عيلة صغيرة علشان تشتكيني لأهلي

صفية : عيب يا بنت .. ده صاحب ابن عمتك

ابتهال : ابن عمتي مين .. هو الاستاذ يبقي استاذ ياسر ؟

ياسر (في ذهوول من الموقف ) : ايوة انا ياسر

ياسر (لوالدته بصوت واطي ) : هي دي ابتهال ؟؟ اومال فين العنين الخضرا دي يا امي .. انا اعرف انها ذاكرة بس .. سلامة نظرك يا امي

ام ياسر : والله يا بني مش عارفة هي فعلا شبهها

ام ياسر (لصفية ) : هي دي ابتهال ؟؟ هي مش كانت عنيها خضرا؟؟

ابتهال : لا يا طنط دي كانت لانسيز

وسط ضحك الجميع .. ونظرات عمر لياسر

عمر (بصوت واطي جدااا ) : مش قولتلك هتطلع لانسيز ههههههههههه

ياسر كاتم الضحك بالعافية

ام ياسر : طب ملبستيهاش ليه انهاردة؟؟

ابتهال : انا مبلبسش الحاجات دي برة البيت يا طنط .. حرام

ياسر وقتها عينه لمحت نهال .. في موقف فعلا يندي له الجبين

[Reninعضو ذهبي]

بانتظار المزيد من تشويقك
شكرا لكي

[باربيمراقب عام]

لا شكر على واجب